నా జపాన్ టూర్ విశేషాలు - Part 1

జీతాలు మరీ పెద్దగా లేకపోయినా,నేను పని చేసే ఫార్మా కంపెనీ లో విదేశీ ప్రయాణ అవకాశాలు బాగానే ఉంటాయి. ఉద్యోగ రీత్యా నేను చాలానే దేశాలను చుట్టిరావడం జరిగింది. అవి 1) బంగ్లాదేశ్ 2) పాకిస్తాన్ 3) స్పెయిన్ 4)ఫ్రాన్స్ 5) జపాన్

బంగ్లాదేశ్, పాకిస్తాన్ల కు మన దేశానికి పెద్దగా తేడాలు కనిపించవు మరియు భాషాపరమైన ఇబ్బందులేమీ పెద్దగా ఉండవు. కానీ ఫ్రాన్స్,స్పెయిన్,జపాన్లలో మాత్రం భాష ఆర్థం గాక చాలా కష్టపడాల్సి వచ్చింది. భాషే కాదు భోజన విషయంలో కూడా అంతే కష్టపడాల్సి వచ్చింది.వెజిటేరియన్ల కైతే మరీ కష్టం.ఈ దేశాల్లో భోజనం దగ్గర వాళ్ళ కష్టాలు పగవాడికి కూడా వద్దనిపిస్తాయి.

ఇక జపాన్ విశేషాలకి వస్తే, రేపు ముంబాయి లో ఫ్లైటు అనగా ఇవ్వాళ సాయంత్రం మాకు జపాన్ వీసా దొరికింది. కానీ మా పాసుపోర్ట్లు చెన్నై ఎంబసీ లో...??!!! కష్టం మీద ఒక స్నేహితుడు సహాయపడి మా పాసుపోర్ట్లు రాత్రికి రాత్రి హైదరాబాద్ కి ఫ్లైట్ లో తీసుకురావడంతో ఈ ప్రయాణం సాధ్యపడింది. లాస్ట్ మినిట్లో ఫ్లైట్ టికెట్లు బుక్ చేసుకోవడం, ఇన్సూరెన్స్, డాలర్లు కొనుక్కోవటం, ఆదరాబాదరాగా బట్టలు సర్దుకోవటం నా జీవితంలో మర్చిపోలేను.

తర్వాత రోజు మధ్యాహ్నం 12 గంటల కల్లా మేము ముంబాయి ఇంటర్నేషనల్ ఎయిర్‌పోర్టు లో ఉన్నాము. అక్కణ్ణుంచి థాయ్ ఎయిర్ లైన్స్ ఫ్లైట్లో బ్యాంకాక్ కి, బ్యాంకాక్ లో 3 గంటల వెయిటింగ్ తర్వాత అక్కణ్ణుంచి థాయ్ ఎయిర్ లైన్స్ ఫ్లైట్లో ఓసాకా, కన్సాయి ఇంటర్నేషనల్ ఎయిర్‌పోర్టు, జపాన్ చేరుకున్నాం. కన్సాయి ఎయిర్‌పోర్టు ఒక ద్వీపంగా చెప్పుకోవచ్చు.ఒసాకా నుంచి దాదాపు 50 కి.మీ దూరంలో దీన్ని నిర్మించారు.దీనిని లాండ్ రిక్లయిం చేసి కట్టారు.

ఎయిర్‌పోర్టు నుంచి కాలు బయట పెట్టగానే నా కంటబడింది ఏమిటంటే పబ్లిక్ స్మోకింగ్ ఏర్పాట్లు. ఒక చోట తెల్ల రంగులో గడి గీసిన చొట యాష్ ట్రే స్తాండులు ఉన్నాయి. స్మోకింగ్ చేసేవారంతా ఆ గడిలోనే నిలబడి స్మోక్ చేయాలి. బజార్లలో కూడా కొన్ని చోట్ల చిన్న చిన్న సందుల్లో స్మోకర్లకి ప్రత్యేక ప్రదేశాలున్నాయి. ట్రైన్లలో కూడా కొన్ని పెట్టెల్లొ స్మొకింగ్ పర్మిటెడ్,. డిస్ప్లే సిస్టంలో ఏపెట్టెలో స్మోకింగ్ పెర్మిటెడొ డిస్ప్లే అవుతూంటూ ఉంటుంది. జపాన్ వాతావరణం చల్లగా ఉంది ( ఏప్రిల్ నెలలో). దాదాపుగా ప్రతి ఒక్కరూ సూట్లను ధరిస్తారు. మరీ చల్లని ప్రదేశాలలో ట్రైన్లలో హాట్ ఏర్ సర్కులేషన్ ఉంటుంది.

జపాన్ వాసులు చాలా మర్యాదస్తులనే చెప్పుకోవాలి. వగి వంగి దణ్ణాల్లు పెడతారు.అది వాళ్ళ గ్రీటింగ్ పద్దతి.
ఆడవాళ్ళు మరీ ఎక్కువగా కనిపించరు. ఉద్యోగాలు చేసే ఆడవారి శాతం తక్కువే. అక్కడ టాక్సీలు చాలా ఖరీదు. ఆ మాటకొస్తె జపాన్లో అన్నీ ఖరీదనే చెప్పాలి. పబ్లిక్ ట్రాన్స్పోర్ట్ సిస్టం చాలా బాగుంది.ఎయిర్‌పోర్టు ఆవరణలోనే మెట్రో ట్రైన్ స్తేషన్లతో ఎంతొ సౌకర్యంగా అనిపించాయి.
కన్సాయి ఎయిర్‌పోర్టునుంచి షిన్ ఒసాకా స్టేషన్ కి గంట ప్రయాణం. ట్రైన్ స్టేషన్ కి బయట ఉన్న ఎలక్ట్రానిక్ కియోస్కులలో ఇండియన్ క్రెడిట్ కార్డులతొ సులువుగా టికెట్లు తీసుకోగలిగాం. గంట ప్రయాణానికి దాదాపుగా 1400 రూపాయలు ( 2800 యెన్లు ) మనిషికి ఖర్చు.
ట్రైన్లలో రిజర్వుడు, అన్రిజర్వుదు టికెట్లు దొరుకుతాయి. ఫేర్లలో కొద్దిగా తేడా ఉంటాయి వీటికి. ట్రైన్ సర్వీసులన్నీ ప్రయివేటైజ్డ్. ఇదే దూరానికి ఒకవేళ మేము టాక్సీ చేసుకొనిఉంటే దాదాపుగా ఏడువేలు క్షవరం అయివుండేవి. టాక్సీ ఎక్కి దిగితే, అంటె 2 కి.మీ మినిమం దూరానికి 350 రూ.లు ఫిక్స్డ్ చార్జ్. ఆపై కి.మీ ఒక్కింటికి 100 రూ.లు అదనం.

ట్రైన్లలో టికెట్ ఎక్జామినర్ బోగీ లో కి వచ్చేటప్పుడు, బోగీ లోంచి వెళ్ళిపోయేటప్పుడు వంగి బొఓగీ లోని అందరికి అభివాదం చేయటం,ప్రతీ పాసింజర్ ని మర్యాద పూర్వకంగా గ్రీట్ చేసి టికెట్ అడగడం నన్ను బాగా అలరించిన విషయం. రద్దీ సమయాల్లో జపాన్ ట్రైన్లకు ముంబయి లోకల్ రైళ్ళకు పెద్దగా తేడా వుండదు. జనాలు ఒక పద్దతిగా ప్లాట్ఫారం మీద క్యూ లో నిలబడటం తప్ప.

షిన్ ఒసాకా లో దిగి మా క్లయింటు నొకరిని కలిసి తిరిగి రైల్ స్టేషన్ కి వచ్చాము. మా జపాన్ ఏజెంట్ అక్కడ మమ్మల్నక్కడ ఒక రెస్టారెంట్ కి తీసుకెళ్ళాదు. రెస్టారెంట్ లో కి అడుగుపెట్టగానే వాళ్ళు మమ్మల్ని అడిగిన మొదటి విషయం స్మోకింగా, నాన్ స్మోకింగా అని. ఇంకో జపాన్ ప్రత్యేకత ఏమిటంటే రెస్టారెంట్ లో, టాక్సీల్లొ కస్టమర్లు రాగానే వారికి వెట్ / హాట్ టవల్ ఆఫర్ చెయ్యటం. మన దగ్గర కొన్ని ఎయిర్‌లైన్సు వాళ్ళు ఆఫర్ చేయటం మీరు చూసేవుంటారు. అది అక్కడ ఒక పెద్ద బిజినెస్.
రెస్టారెంట్ లో చాప్ స్టిక్కులతో మా విన్యాసాలు, అవస్థలు చూడలేక మా ఏజెంట్ మాకోసం ఫోర్క్, స్పూను తెప్పించి ఇచ్చాడు.జపనీస్ నూడుల్స్ ఆ ఫోర్క్, స్పూన్లకు ఏమాత్రం లొంగలేదు. నానా అవస్థలూపడి ఏదోలా భోజనం అయ్యింది అనిపించాము. తరువాత మా ఏజెంట్ కి టాటా బై బై చెప్పి టోక్యో కి బుల్లెట్ ట్రైన్లో బయల్దేరాము. ఒసాక నుంచి టోక్యో దాదాపు 515 కి.మీ. ఒసాక - టోక్యో బుల్లెట్ ట్రైన్ సర్వీసుని "షిన్ కాన్సెన్" అని అంటారు. 515 కి.మీ దూరాన్ని ఇవి రెండున్నర గంటల్లో పూర్తిచేస్తాయి. ఒసాక నుంచి టోక్యో కి ఈ బుల్లెట్ ట్రైన్ ఫేర్ దాదాపుగా 7500 రూ.లు. ఎయిర్ ఫేర్ తొ సమానం. కానీ చాలామటుకు అందరూ ట్రైనే ప్రిఫర్ చేస్తారు, ఎందుకంటె ఎయిర్ పోర్ట్లు సిటీ కి దూరంగా ఉండటం, చెకింగ్, బోర్దింగులకు చాలా సమయం పట్టడం మొదలైన కారణాల వల్ల. ట్రైన్లలో సీట్లకు ట్రే టేబుళ్ళు ఉండటమేకాదు, కావాలంటే సీట్లను వెనక్కు జరుపుకోవచ్చు, వెనక్కు తిప్పుకోవచ్చుకూడా. ట్రైన్లు అన్నీ వైఫయి ఎనేబుల్డ్.ట్రే టేబుళ్ళ మీద లాప్ టాప్ పెట్టుకొని పనిచేసుకోవదానికి వీలుగా ఉంటాయి. కొన్ని డబుల్ డెక్ భోగీలలో చిన్న లిఫ్ట్ కూడా వుందటం చూసాను. లగేజీ ని పైకి మోసుకెళ్ళనక్కర్లేకుండా ఈ లిఫ్ట్ లను వాడుకోవచ్చు.రైల్వే స్టేషన్లలో మన స్వీట్ బాక్స్ లాగ ఉండే లంచ్ బాక్స్ లు అమ్ముతారు, వివిధ రకాలైన కాంబినేషన్లలో ఇవి దొరుకుతాయి. ఖరీదు దాదాపు 350 రూ.లు. మరో జపాన్ ప్రత్యేకత ఏమిటంటే గ్రీన్ టీ.
500 మి.లీ బాటిల్ గ్రీన్ ట్రీ 60 రూ.లు ఉంటుంది. అందరూ మంచి నీళ్ళకు బదులు గ్రీన్ టీ తాగుతారు. గ్రీన్ టీ ఆరోగ్యానికి మంచిదని వారి నమ్మకం. ఈ గ్రీన్ టీ చాల రకాల ఫ్లేవర్లలో దొరుకుతుంది. జనాలు ఒక లంచ్ బాక్స్, గ్రీన్ టీ బాటిల్ కొనుక్కొని ట్రైన్ ఎక్కి, ట్రే టెబుల్ మీద పెట్టుకొని తినేసి,ఖాళీ డబ్బాలను, ఖాళీ బాటిళ్ళను ప్లాస్టిక్ కవర్లలో బిగించి స్టేషన్లో దిగాక అక్కడ వుండే ట్రాష్ బిన్ లలో వేసేస్తారు.ఈ ట్రాష్ బిన్లలో వేసేటప్పుదు మనం చెత్తని సెపరేటు చేసి వేయాల్సివుంటుంది. రీసైక్లింగ్ కి సెగ్రగేషన్ కీ సులువుగా ఉండడానికి ఆ ఏర్పాటు.